Si jénès té sav, si lé vyé té pé
Twa jénérasyon ja pasé si mwen, on katriyèm ja ka monté an flèch
Fout lavi la ka woulé vit, pli vit ki on zétwal filant an syèl nwè la
An ja rantré an ran a vyé moun , èskizé sényò zòt ka di aprézan
Lè an gadé jan nou ka viv alèkilé,
an ka di pétèt an té tini on chans lè an té piti
Zòt jénès a jòdila, sé zòt ki sé lé vyé a dèmen
Tini biten zòt dwètèt konnèt pou zòt vansé an bon chimen
Kouté sa !
Kouté pou konprann é pou ay pli lwen
Lézansyen pa té tini gran zafè a lékòl ni lajan
Yo té ka viv avè lanati, yo té ka gannyé onlo biten adan’y
Manjé, dlo sous frèch, klè, san klòwdékòn,
Zèb, rimèd razyé pli fò ki médikaman a zouk la
An plis, i té ka ba’w bèlté, kontantman a zyé, a kè, a lèspri
É sé té san konté si maji a sé gérisè é gadètzafè la
Ou té ka aprann onlo biten avè lézansyen,
Ou pa té ka péyé ayen, ki sé lison, fòwmasyon, sèvis
Sé té lékòl a lavi, bon lékòl toubòlman
Ou té ka viv byen avè tout laliwondaj a’w
Menm si dékèkfwa té ka tini on babyé
Oben yonndé moun a vyé lang sal ki té ka jiré atiwlarigo
lè yo té brè dé fé ou lè yo té kòlè
Pétèt yo té ka vrè tibren mizè mé sé moun lontan lasa,
Yo pa té tini tout sé méchansté é vyolans la nou ka vrè konyenla,
Yo pa té’é jen lésé on moun mò fen,
pas i malélivé ou parapòt a défo a’y
Men a yonn té ka toujou kenbé men a lòt la
Pou malè pa rivé’y
Pa té tini kouran ni dlo ka koulé an wobiné,
Kant a gaz sé pa chopin ou té ka achté’y adan lolo la
yo pa té menm sav sé sa ki té pétwòl
Yo pa té kouyon pas yo té sa sèvi avè’y, limé on récho
On lanp, chofé on kawo pou dégoudi lenj a yo
É trasé kouto a pantalon a sé misyé la pou yo karé
Yo té sav tout biten té tini on valè
Tout moun té tini on valè, gran kon piti
Lé pli zansyen té tou fré sòti anba jouk a mèt blan la,
É apa é anman anba bòt a soren
Yo té ka lévé’w anba zèl a yo pou malè pa té rivé’w
Yo té ka palé ba’w pou’w té rété dwèt, pou rèspèkté
tout moun é tout biten a moun osi
Yo té ka rakonté timtimbwasèk souvantman lè solèy kouché
Chak kont a konpè zanba é konpè lapen sé té on lison a lavi,
Tout moun té ka kouté pou té wouvè lèspri a yo é mété an pratik
Ponmoun pa té vé wouviré adan sitiyasyon a lèsklavaj la
Jòdijou onlo adan nou pèdpyé
yo oubliyé tou sa lé pli vyé té montré yo
Ki jan sa fèt, pouki sa fèt, pouki nou pa enmé nou ankò ?
Onlo adan zòt san kaz, san fanmi, zòt ka viv an lari, sal
Détwa té ké vé rédé zòt, mé kijan ? Zòt ka fè yo pè
Papa é manman zòt ka hélé anmwé-alasasen
kant a mami é papi a zòt, pa menm palé, yo pa ka dòmi ankò
Yo chouboulé toubòlman, yo ka mété enpé séri an pòt a kaz a yo,
Alawm, kaméra, chyen méchan, yo barikadé kon si té tini lagè
Lagè pétèt byen
Bonbans, kouyonnè, télévizyon
Lajan san travay, moun pò té kò jan vrè biten kon sa,
Pli yo ba’w, pli ou vlé, nòwmal ou pa ka swé
Yo fè tout biten swadizan pou tiré pèp la an mizè,
Yo fin pa réyé nanm an nou é kè an nou fèmé piti-a-piti
Nou moulé kon gato pou konsomé tousa ki ka rantré
Adan tousa, lanati rété dèyè,
Fanmi la ja fann, pété menm,
Timoun ka dòmi déwò, pa ni kont ankò, pa ni lanmou
Gadé la nou rivé avè zafè a dlo an wobiné la
Ayen an rivyè pa bon ankò, ni bòdlanmè
É fò tout moun manjé, fò ou konsomé
Ola lajan pasé ? Pouki zòt pa ni travay ?
mizè rivé alòs fò chak moun sové po a yo,
Rèspé fini, dwòg rantré pou oubliyé mizè,
fizi a zòt ka palé fransé, sé byen lagè
Mé an ki pòch sé lajan lasa ka rantré
Sé timoun la, lè lèspri a zòt ké byen sizé an tèt a zòt,
Réfléchi asi mizè a zòt, mizè a latè é fanmi a zòt
Sonjé mizè a lézansyen, mizè ki ka atann pitit a zòt,
Pouki lavi aprézan tini paké soufrans lasa ?
Réfléchi si divini a zòt, pa pè mandé lézansyen konsèy
ka zòt vé pou zòt menm, pou dèmen a zòt,
pou fanmi a zòt ki ja pasé tan a mizè ?
Ka zòt vé pou timoun a zòt, ka zòt ka lésé ba yo
Pou yo kontan viv si latè dèmen
Lisèt
Latilyé maké ansanm, désanm 2021