Pyé ka palé

An ka tann yo ka di an pòs la

2022 ka rivé démaré lanné la d’un bon pied

 

Mwen-menm, an ja sav ka ki démaré d’un bon pied ba yo

Yo bizwen ay tranpé mwen koté minui adan dlo frèt la

Anmenmditan dòt ka fè bèbèl adan soulyé vèwni, èspadri, èskawpen

Yo fawdé, yo tini tout kalité dyèz anlè zong a yo

Yo jis kay aka èspésyalis a zong

Yo ka karé ba’w, yo fyè, yo bèl, yo ka dansé

 

Dayèpouyonn, an désidé a konté dè jòdila é dorénavan an tini on non

 An konmansé pa batizé mwen épi jimo an mwen osi

nou sé lé Nékras pas yo ka touvé nou lèd

nou kon lé pèp kozak, awa a pa tanbouyè la

Sé sé moun lwen lwen la , on koté ki ka fè frèt,

yo ka chofé kò a yo avè po a sé zanimo la apré yo manjé yo

Yo ka di sé moun lasa, yo pa pè ayen, pa menm lanmò

Pa konnèt mové.

 

Jòdila an di awa, an ka rété an soulyé an mwen,

An pa k’alé pran ben démaré, ki mafouti ésa !

Davra yo ay chèché mandarin pou fè moun plézi,

Yo pa mété p’on soulyé pas yo ka kwè an pé’é jenmé tini on féblès

 Èben lè an vrè chak pikan la, an té ka tranblé

Mé an sitèlman pa té anvi alé an dlo frèt la lè trant-é-en

An bouré gyap ! adan yonn

Mi hélé an mwen

yo pèd sa yo té vini chèché sé té kouri

Ay chèché pansman, alkòl tout latilé a pansé bobo la

An touka, pou on prèmyé fwa an té trankil,

Nékras pa touché tè pandan enpé jou

An té adan enpé bandaj é yo té pè bouré mwen on koté

Yo té ka karésé mwen, okipé dè mwen, an té o ti swen

É pandansitan jimo an mwen té tini tout chaj la pou’y tousèl

Mé yo konprann ka pou yo té fè

 

Atann mé mwen Nékras 2 an ka di zòt sa pa rété lontan

Yo touvé sé mwen ki bèt nwè la, tout biten si do an mwen

Ki sé maché, monté é désann

Magré mank a jimo an mwen, yo pa ka rété an plas,

Alòs do an mwen konmansé wondi kon do a krapo

An ka soufè, an pé pa touché tè avè lafyèv

Kifè yo konmansé ka okipé dè mwen osi

konprès, fwoté, ben tyèd avè sèl é noni, pasé krèm,

Anw ! Zòt vrè aprézan  ka ki dé pyé

 

Aa! zòt pa janti lafanmi,

Mwen an pé pa di sa pas yo ka okipé dè mwen byen

Sòf ki lòt jou, nou ay dansé, yo paré mwen bèl,

kitèks, payèt, yo té achté on bèl ti soulyé a talon ban mwen.

Nou konmansé dansé , té tini bon anbyans,

Soulyé nèf a talon ho konmansé di i las

An té ka santi zarigo an mwen ka raché piti-a-piti

Érèzman chivi a yo kaskòd, yo foukan a tè,

Yo pa té menm sa doubout ankò.

An ka di zòt sa, kwa si bouch

Sa ban mwen on bèl favè é an té kontan

 

É mwen, é mwen, kouté mwen

Yo enmé fèmé mwen adan soulyé byen lasé é séré pou ay maché,

An chan bannann, an bwa la, rasin é wòch ka atann vou pou ba’w on bèl paspyé

An déboulé an tout jan an lari,

An pa ka vrè solèy ankò, an blenm kon moun mò.

Zòt sav ka ki rivé mwen

Ben po an mwen flétri é i vin plisé kon tété a vyé fanm

Avè sa, mwenn ti touché i ja kòché é sa ka fè mal

Yo té oblijé lésé mwen rèspiré enpé

 

« Jè dèmand lamen ou lè pyé »

Awa, lè ka pasé nou pé ké ni tan, on dòt fwa kouzen

 

É lé pèp, an ka vrè zòt p’on yonn pa kontan sitiyasyon a zòt

Ki sé talon ki fann afòs danmé lari san soulyé

Ki sé zòtèy ka monté yonn si lot,

ki sé vant two gwo kifè yo pé pa touché bout a zòtèy a yo ankò

Menm sa ki o ti swen ka soufè.

 

Fò zòt sav chyen maré sé pou bat, é sé chyen lasa sé nou : pyé

Menm lè zòt pé ké ka fè ayen ankò,

zòt ké o rèpo mé zòt ké ka soufè toujou

Malè ka atann zòt kouché si on kouch é sa sé lanfè.

Yo ka kriyé sa èska, bobo ki pa ka géri é ki ka kontinyé fouyé, fouyé

Alòs tousa an pé di zòt sé kenbé.

 

Lisèt

Latilyé Maké ansanm, désanm 2021