Nyouz a avril 2024
Byen bonjou,
Sé avè anpil plézi nou la, pou prèmyé Nyouz a lanné 2024.
Sé dènyé tan la, enpé potomitan ki avè travay a yo sé bèl modèl pou konnèt monté an filao. Mwa la la, sé Maryse Condé ki alé.
Madanm lasa maké liv moun ka li toutwonlatè. I pòté wo é fò lidé ki té ta’y é mannyè i té ka konswa lavi adan mo i sanblé si papyé davwa lalibèté. I fè’y an fransé é yo chalviré liv a’y adan enpé dòt lang. Menm mannyè la, enpé syantifik a diféran péyi asi latè ka étidyé travay a’y.
Annou sonjé, lanmò la pou pèwmèt réyalizé jan tout biten pou on tan é jan toujou ni lison an tout biten. Sé on ovwa ki pa kon tout ovwa. I la pou fè pran sans a sa ki ni. Kifè, nou pé mandé nou, ès an lang an nou osi nou té’é pé vwè on litérati avè maké ki osi fò ki ta Maryse Condé dévlopé ?
Pou-tout-bon, sitiyasyon a lang la chanjé é ka kontinyé chanjé avè tan. Mé, ès i tini pou otan plas i té’é dwèt ni an sosyété an nou ? Ki plas enstitisyon an nou menm ka ba lang la ? Ès tini on politik séryé pou pèwmèt lang la vansé an sosyété an nou ?
É lang la lékòl jòdi, asiré ! Mé, oti zouti pou pèwmèt pwofésè travay yé ? O rézilta a wouchach syantifik a jòdijou asi lang la séré ? Avè, konmen adan jénès an nou ka vwè èvè lang ni enpé chimen yo pé pran pou étid a yo ? Ka ki fèt an sosyété la menm pou pèwmèt, yo pé réyalizé sa ?
Piplis ankò, ki kondisyon moun ka maké lang la oblijé fasadé ? Ki plas éditè a téritwa an nou ka ba liv maké an lang la é ka yo ka dévlopé pou fè sé liv lasa fè douvan osi ? Épi, ki plas a sé liv lasa adan bibliyotèk a téritwa an nou ?
Pou bout, ki entérèsman moun an nou ni pou liv ? É èspésyalman pou liv maké an lang an nou ? É, ka ki té’é fo pou alfabétizasyon a pèp an nou an lang pwòp lang a yo ?
Nou ké lésé chak moun ba tout sé kèsyon lasa répons é vwè lyannaj ki pé ni ant yo chak é prèmyé kèsyon an nou.
Sa nou pé di, sé travay dèyè pò’ò mannyé ! É sa té’é byen, nou on jan konmansé maré ren an nou piplis pou fè douvan padavwa vansé a lang la, a pa dòt ki vansé an nou menm !
Gadé vidéyo la : Nyouz a avril 2024
