On kontré avè Marius NUMA

Marius Numa. Crédit Photo : SaneMarius NUMA sé on pent Gwadloup. Dépi i tou piti, koulè ka valsé an lèspri a’y. Lavi fè i touné i viré an diféran chimen, mé antoutjan, kisiswa pa la i té k’ay, sé toujou penti ki té la ka rélé’y. Alòs, i désidé kouté kè a’y.

« Piti, an konmansé désiné. Mé an pa jan konprann sé té ké sa travay an mwen. An aprann dòt biten, an travay diféran koté mé rivé on lè an pa té pé ankò, té fo an kité sa an té ni andidan mwen sòti. Penti pou mwen sé on nouvo nésans. »

Marius NUMA ka woulé dépi bon enpé tan konyenla adan latilyé a’y an vil Bastè adan batiman a ansyen kolèj Campenont. Alè,  i ka fè tablo, ka pentiré asi lenj é osi i ka pran tan pou bokanté konésans i trapé ki adan lékòl o avè asosiyasyon. É, gran kon piti pé jwenn li osi pou aprann épi’y.

« Sa ka rivé délè ou pé fè on biten é moun ka vwè sa fasil mé yo pa’a réyalizé sé lanné é lanné é lanné a pratik. Sé lè é lè ou ka pasé adan on latèlyé. Épi, kon ou ni lanvi adan’w, ou ka fè wouchach ki fo, ou k’ay la i fo, ou ka ouvè zyé a’w la i fo osi pou pran sans a fonksyònman a sa ou vlé fè. »

Lanné lasa èspésyal pou’y davwa i ba travay a’y on lòt balan avè prèmyé èspozisyon a’y ki té ni pou non « Stigmates ».

Affiche de l'exposition Stigmates de Marius NUMA« Lawtistik pou mwen, sé on jan lanati ki ka kontrayé’w parapò a soufrans ou viv, parapò pétèt a mizè pèp a’w ka vwè, parapò a on libèté ou vlé ni, èks. Dépi piti an sansib a istwa a Gwadloup é adan ‘stigmates’ sé jistèman doulè ou ni adan’w menm é an menm tan sé mizè a pèp a’w, an menm tan sé tout maltrétans moun ka fè parapò a on sitiyasyon  kon lè yo ka di po a’w nwè, né a’w gwo o two plat, zorèy a’w two gran, chivé a’w two grenné, èks èks. On moun pé touvé’y ka viv avè sa dépi tou piti é sa la andidan’y, sa ka rété piké an kè a’y é fò i grandi avè sa. Sé pou sa an trè sansib anlè on biten sé : pòté mak ka sonjé. »

Anlè zafè a istil la, Marius NUMA ka konsidéré i la ka « chèché koulè a’y toujou ». I enmé onlo tou sa ki aw karibéyen, aw afriken, travay a diféran moun kontèl Joël Nankin, Goody, é dòt ankò mé asiré pou’y :

« Penti a’w sé’w. Menm si dòt pé ka enspiré’w, mé kout penti a’w ké toujou ta’w. An ka kwè moun ka penn pou konstwi yo menm. Mwen, si an pa té ni penti an vi an mwen an pa sav sa an té ké yé. Penti sé on biten ka ékilibré’w asi istwa a vi a’w. Sé  pou sa chak awtis ni mannyè a’y i ka penn.»

Palé avè Marius NUMA sé konsidiré sé on liv ou ka kouté pou syans i ka dévlopé. Tou sa ka ba travay a’y anpil fòs. É a pa an penti sèlman i ka woulé. Pou vré, i ka chanté osi avè 2 gwoup poto-mitan an kilti Gwadloup : Voukoum épi Fòs é tradisyon.

Avan rivé la, i woulé avè plizyè gwoup a kannaval : Ti kanno, Akiyo. Mé, sé lè nonm Zabim lasa désann viv pa asi Bastè i rantré an Voukoum é tan fè i vin touvé’y dèyè mikwo. Mizi-an-mizi, i fè vwa a’y é afòs afòs, i jis vin touvé’y ni posibilité travay avè on 2èm ékip. Mé ant penti é chanté, pa ni yonn ki ni plis valè ba’y :

« Pou mwen chanté é mizik kon dé pwa a on balans. Yonn a gòch, yonn a dwèt é sé ékilib a’w »

On awtis ki ka viv an plen sa i enmé, ki ka maché pou toujou rivé pli lwen adan konésans a li menm é ka chèché transmèt avè aw a’y, mi sé tou sa nou vwè lè nou jwenn Marius NUMA adan latilyé a’y. Nou ka byen èspéré sé syans ki ké pé wouvè zèl a’y toujou plis é vwayajé tout ola i vlé.

Kontak a Marius NUMA

Tel : 0690 34 36 86

E-mail : marius97139@live.fr

Crédit photo : Sane

Laisser un commentaire

Ce site utilise Akismet pour réduire les indésirables. En savoir plus sur comment les données de vos commentaires sont utilisées.