Mès é labitid

Fen a lanné ? Ka sa yé sa ?

Pou chak moun, an ka kwè, i diféran

é sé dapré laj a moun la osi

épi, i pé chanjé, tou dépan ki jan ou pasé lanné la

Lè ou té piti, ou té ka kontan lè fen a lanné té ka rivé

Sé té lè a chanté kantik a nwèl

Tan a kyouyé kochon é manjé bouden

Tan a lanmès dézinosan avè bèl lenj nèf a’w

Tan pou ay di bondyé bonjou é tout laliwondaj la osi

Dékèkfwa on zétrenn té ka tonbé,

Ki sé on balon, on sik, on mandarin

Ou té ka kontan trapé’y, maléré pa ni gwo kè.

Épi tout sé lidé la sa ka chanjé

An menm tan ou ka grandi,

Kè a’w ka ranpli avè lodè nèf

Lodè a krèch, sapen, giwlann,

Chanté nwèl, mès minui, on lodè a bondyé,

Lyannaj, lanmou, kontantman

Ou ka fèmé zyé a’w pou rèspiré sa

Ou byen, ou ka vwayajé, ou ja rivé o fiwmaman

Lè ou wouvè zyé a’w, lodè la toujou la,

Mé ou ka santi lodè nèf ka rivé,

Sé tan a bòdé, trantéen désanm, kat a bòn ané,

Tan a kòkòlò, kè a’w ja fè vipvap, ou transfòmé

Tèt a’w plen avè tout sé nouvoté lasa, ou konmansé révé

ka ou kay fè pou nouvo lanné lasa,

ou vé réisi lègzamen, touvé travay, rantré akaz a’w

Fè fanmi a’w plézi , fè yo kado, di yo mèsi

Ou konmansé pa ay pran ben démaré a’w

Mi ou fè on kalmaté adan sa yo ka kriyé lavi

Ou ka konmansé mandé’w ka ki fen a lanné

fò ou tini lajan pou fè lafèt, prévwa kado, vwayajé

ki sé kwazyè ou avyon pou ou ay vrè fanmi a’w an frans

Lé zanné ka pasé é ayen pa’a chanjé, latè ka bout on lantou

é i ka ataké on dòt lantou kon dépi nanninannan

é i ké kontinyé touné touné a’y.

Nou, déti yenyen adan linivè, nou yenki fè kalandriyé

Pou lèspri an nou pa vòltijé adan touné a latè

é nou désidé i ka fini on lantou on trant-é-en désanm

é i ka konmansé on dòt lè prèmyé janvyé

Alòs, nou ka fété sa an tout jan pou maké jou lasa

Nou ka swété nou tout bon biten joudlan

Afòs, nou ka fin pa mandé nou

Mé ka ki bon biten é ola sa pasé ?

 

Lisèt

Latilyé maké ansanm, désanm 2021