Lib & Tè
« Vivre libre ou mourir »
Sé sa Dèlgrès dwèt di lè i fè pété kaz O Matouba èvè tou Sòlda libèté owa a’y.
Libèté an mwen menm jan : Fondal.
A pa pèson kay pé volé’y jan an désiné’y ban mwen menm an mwen.
Boujé, désidé, chwazi, pran tan an mwen, blaz kò an mwen, rèspiré
sé prèmyé jédkat sèt-fanmi an mwen.
Pwogramé, pwopozé, lè an vlé, silon lidé an mwen,
sé dézyèm lanm a kouto an mwen.
Pa wondi la si ou vé pa blésé an sa.
Libétè an nou tout sé on biten ki maké asi papyé, ki ka palé palé a’y men ki pa vérité vré.
Freedom sé non a’y an Méyiken.
Démokrasi sé on dòt non lè moun ka palé pou on péyi men nou ka byen vwè mizi-an-mizi, sans a’y pa ni annyen a vwè èvè sa pou i dwètèt.
Otorizé’w gadé, otorizé’w di, otorizé’w fè, konnèkté san kondisyon, lyannaj, bokantaj … ka pèkli, ka disoud.
Pi sé pèp la ki an démokrasi rèvandiké libété a yo é pi kou-t-baton ka monté si yo.
Ola nou k’alé menm ?!
Antouléka, lalit pòkò ka bout menm :
« … sové péyi la pou gannyé libètè an nou »,
« sové péyi la pou gannyé libètè an nou.»
S_exPӔnsée‾r
Latilyé Maké ansanm, mé 2023