Izidòw é Èwnèstin

Èwnèstin ka palé pou mari a’y…

Izidòw, kouté mwen byen, an pé’é woudi’w menm biten la ankò … An las épi sa…  An pèd konésans a tou sa an té ja sav… Fo ou pwan on papyé é maké sa ou té di mwen, tou sa an té ni pou fè pou sé pyébwa la.

Maké tout ban mwen konsa an ké apwann li mo a mo… Ou tann Izidòw ?  Pa fè mwen ba’w p’on kou si do. An las épi sa… Sé toujou menm biten la épi’w, ou sanfouté…

É malè pou’ w, tout tèt an mwen pa la mé an pò kò tèbè….

Izidòw réponn mwen ! Ou konsa ou pa’a tann ankò…

Izidòw ou byen ? Ou vlé an kriyé sèkou ba’w ?

Yè sé té mwen, an té pèd konésans… Alèkilé sé tou a’w…

Mé ka i ka pasé isidan ?

Ou té’é jan di yo mè’è mété kèk gyongyon pou fè nou disparèt tou lé dé ansanm ?

Menm si nou mayé dépi nou té jenn…an vé pa mò an menm tan ki’w…

An vé la pou vwè ki jan ou ka pati…

An vé vwè dékatman a’w lè tout moun a’w ké pasé jété on zyé anlè’w…

Izidòw ! … Izidòw ! … Izidòw ! Lévé ! Jou a’w pò kò rivé.

Izidòw pa ka réponn. Izidòw pa ka lévé. Izidòw ja fwèt.

É ka i rivé … Èwnèstin fè yonn sé kou kòlè la, i té fò adan sa… kyè a’y arèsté fap !  

É mi, jòdijou, Èwnèstin é Izidòw, yo la tou lé dé byen kouché ka atann fanmi a yo pasé yonn aprè lòt pou gadé yo on dènyé fwa. 

Ou pé on pyès-fanm, sa ou ka prévwa pé pa fèt … Sé Bondyé i mèt…

Sèwvàn

Latilyé Maké ansanm, avril 2022