Gadé manjé

Sizé an jaden la

Zyé an mwen rété asi twa pyébwa.

Sé dé prèmyé la, yonn owa lòt, twazyèm la a senk mèt.

Yo ka lyanné pou pran é bay énèwji.

 ki an vlé ou pa vlé, yo ka rann mwen’y

Gadé manjé !

Fèy a pyébwa la ka briyé,

I kon on men a dIs oben douz dwèt.

Yo ouvè ka di’y mi kado a latè

Pou kontanté lèstomak, ranpli bouden, rèsté gaya.

Koulè vèw an mèt, fonsé, pal é détwa fèy jòn.

An mitan a senk men ki pran pozisyon a on zétwal,

Ni dé fwi won, yonn pli gwo ki lòt délè.

Vèw, mawon é on koulé lèt lè i mi.

Chak branch a pyébwa pé ni jiska twa zétwal

Gadé manjé !

Vèwtikal, branch a yo yonn si lòt, fèy ka mélanjé

Ka monté an syèl, ka ékilibré lé koté.

Van ka souflé, zétwal ka dansé, branch ka dandiné.

Menm pyébwa la pli lwen, pli ho,

Puisan tay fin, i ni ganm, pousé kanté

Pa owa sé dé paralèl la.

Branch é fèy pa ka mannyé.

Dèyè sé branch la, on syèl blé a lanmè.

Lè an lévé é gadé pli lwen ,

Sé niaj la anvayi blé la, blan kon lèt.

Van ka souflé, zétwal ka dansé, branch ka dandiné.

Asi pyébwa lasa, ou ka kontré manzèl pòpòt,

Pa rété gadé’y konsa,

I dous, i sikré kon myèl.

On zozyo ka chanté pli lwen ,

Lè an touné tèt an mwen , an vwè dé menm pyébwa.

Gadé manjé !

 Aprézan ou dwèt ka vwè,

Dè ki pyébwa an ka palé !

An frit, graten, piré, soup

O fou, gwo sèl, fri, sòwbé, chodo, pen,

I ni fib, vitamin, antiyòksidan,

Fo gadé pou sa mè sé fèy la sé on médikaman.

Gadé manjé !

É si sa tousèl i ka ba’w !

Biten dèyè poko mannyé

SYA

Latilyé Maké ansanm, mé 2023