Nyouz a jen 2025
Byen bonjou,
5 jen 1984, Gwadloup, pannan lanmès a lantèman a Vélo, Pè Chérubin Céleste mandé moun ki té an légliz la : « Ès nou tout dakò pou fè 5 jen jouné a gwoka an Gwadloup ? »
Vélo, ki té ni pou non batèm Marcel Lollia, té on gran tanbouyé a gwoka. Jou a mò a’y, moun déplasé kon pa tini pou dènyé vwayaj a’y lasa. Sé sa ki fè, Pè Céleste pofité pou palé ba pèp la é fè’y wouvè zyé a’y asi plas pou ba tanbou. Labé Gwadloup lasa té on gran défansè a kilti é a lang a lilèt a’y. Sé dayè-pou-yonn on moun pòtalan a listwa osi parapòt a pozisyon i pran adan enpé konba pou défans a dwa a pèp la é osi a ta pèp a dòt téritwa a Lakarayib.
Pè Céleste woulé pou moun réyalizé richès a éritaj kiltirèl a yo é fòs a rèspé a lavi. I doubout kont sa ki té pou’y rézilta a oprésyon é mépri. I fè pou défèt lidé a sa ki ta Nèg mové. É i palé asi mannyè fò moun viv an awmoni avè tou sa ki ka fè yo. Sé pou sa, jou a lantèman a Vélo, i palé pou fè moun konprann fò fè pli douvan avè tanbou la.
Alè, nou an 2025 é Gwadloupéyen ja fè bon enpé chimen ki avè tanbou ki avè lang a yo. Apoubonvré, an vil Lapwent, tini on lari ki ni non a Vélo é osi on èstati a’y. Sé la ki Lapyétòn. Sé an lari lasa Vélo té ka mété’y pou jwé tanbou tout lè. An lonnè a’y, dépi lanné é lanné bon tanbou ka désann lé sanmdi an lari lasa. Piplis ankò, chak mwa jen, gwoup Akiyo ka òwganizé on fen-a-simenn an mémwa a Vélo. Yo ka kriyé’y Mémoryal Vélo. É pasé tou sa, tini fèstival a gwoka chak lanné. Parapòt a modèl misyé Georges Troupé bay, tini lékòl a gwoka an tout lilèt la. É fò kontinyé ! Kontinyé fè douvan ki avè tanbou la ki avè lang la davwa vansé pa ni bout, sé alé pou alé ! É sa, sé toujou rézilta a désizyon moun ka pran. Konfèdmanti, sé désizyon ki ka chouké adan on biten : lanmou moun tini pou yo menm.
Alòs, nou pé anki èspéré moun Gwadloup, é osi moun a dòt téritwa ki viv on menm réyalité istorik, toujou kontinyé ni plis lanmou pou yo menm pou ay toujou pi lwen. Fò byen vwè, vansé avè sa ki ka fè nou, pa dòt ki aksèpté VIV an plen.
Gadé vidéyo la : Nyouz a jen 2025
